Скаут Сатпаевтың дебюті туралы: Ерте емес, бастысы — дұрыс пайдалану
Серия А клубтарымен жұмыс істейтін скаут Алекс Великих 16 жастағы шабуылшы Дастан Сатпаевтың Қазақстан құрамасындағы алғашқы ойындарына пікір білдірді. Оның айтуынша, жастық жас кедергі емес, тек футболшыны орнымен пайдалану маңызды.
«Қазіргі бабын ескерсек, бұл оған ерте деп ойламаймын. Бірақ оны тым мақтап не сынап, артық қысым жасауға болмайды. Уақытымен, біртіндеп енгізу керек. Ол әлі толық қалыптасқан ойыншы емес, бірақ талант пен әлеуеті жеткілікті. Әсіресе матч соңында 10-15 минут алаңға шығуға өте пайдалы бола алады», — деді Великих Legalbet.kz сайтына берген сұхбатында.
Сатпаев Уэльске қарсы ойында (1:3) Қазақстан құрамасы сапында дебют жасады, кейін Лихтенштейнмен өткен кездесуге де (2:0) қатысты.
Еске салайық, жас шабуылшы «Қайрат» клубынан шығып, 2026 жылдың жазында Англияның «Челси» командасына қосылды.