Волейбол: «Қуаныш» командасы «Берелмен» таразы басын теңестірді
Өскемен қаласында волейболдан әйелдердің ұлттық лига командалары арасында Қазақстан чемпионатында «Берел» мен «Қуаныш» жартылай финалда екінші кездесуін өткізді деп хабарлайды Prosports.kz тілшісі ҚазАқпаратқа сілтеме жасап.
Кеше Ришат Гилязутдинов жаттықтыратын өскемендіктер солтүстікқазақстандықтарды 3:0 есебімен жеңіп, финалға жақын тұрған еді.
Бүгін алаң иелері білгенінен жаңылғандай күй кешті. Ал Азамат Есімовтің шәкірттері керісінше жанкүйерлеріне қуаныш сыйлады. Алғашқы екі партияда олар айқын басымдылық танытты — 25:19, 25:17.
Үшінші сетте 8:5 есебімен «Қуаныш» алға шыққанымен, «Берел» де қарап қалмады — 9:8. Есеп 16:16 болған мезетте өскемендіктерден Кристина Белова жарақат алып қалды да, оның орнына Кәмила Сұлтанбек шықты. Осыны пайдаланған солтүстікқазақстандықтар есепті 20:17-ге жеткізді. Татьяна Яцкивтің сәтті ойынының арқасында «Берел» таразы басын теңестіргенімен, одан әріге шамасы жетпеді — 23:25. Қорытынды есеп 3:0-мен «Қуаныштың» пайдасына жазылды.
Қос команда 8 наурыз күні шешуші, үшінші ойынды өткізеді. Қай жеңгені финалға шығып, «Жетісуға» қарсылас атанады.