Астанада төрт құрлық чемпионы Михаил Шайдоровты әуежайдан қарсы алды
Төрт құрлық чемпионы, Азиада-2025 жүлдегері Михаил Шайдоровты әуежайдан қарсы алды, деп хабарлайды Prosports.kz
Бүгін Астана халықаралық әуежайында мәнерлеп сырғанаудан Төрт құрлық чемпионатының жеңімпазы, IX қысқы Азия ойындарының қола жүлдегері Михаил Шайдоровты салтанатты түрде күтіп алды.
«Шынымды айтсам, Төрт құрлық чемпионатында 1-орын алатынымды күтпедім. Иә, жүлделі орынға таласуға мүмкіндігім болды. Бірақ марқұм Денис Тен чемпион болған елде, спорт сарайында жетістікті қайталау керемет эмоция сыйлады.
Жеңімпаз екенімді әлі толық сезінбедім. Қысқы Азия ойындары мен Төрт құрлық чемпионатының арасы өте жақын болды. Енді аздап тынығып, әлем чемпионатына дайындалуға кірісемін», - деді өз сөзінде Михаил Шайдоров.
Айта кетейік, Михаил Шайдоров араға 10 жыл салып, Төрт құрлық чемпионатынан ел тарихындағы екінші алтынды жеңіп алды. Сондай-ақ, IX қысқы Азия ойындарында да жүлделі үштікке кірген болатын.