Қазақстандық файтер басты жекпе-жеке шығу үшін сыйақысынан бас тартты
Қазақстандық файтер Тамирлан Саралапов Қостанайда өтетін Naiza 71 турнирінің басты жекпе-жегінде өнер көрсету үшін гонорарынан бас тартты, деп хабарлайды Prosports.kz Meta-ratings.kz-ке сілтеме жасап.
Турнирге бір күн қалғанда қазақстандық спортшы 1100 грамм салмақ тастай алмай, ресейлік Иван Даниловпен өтетін титулдық жекпе-жек алдындағы өлшеу рәсімінен өте алмады.
«Пресс-конференцияда Иван жекпе-жекті сақтау үшін қолдан келгенін жасадым деді. Шын мәнінде, олай емес. Керісінше, біз олармен келісуге тырыстық. Соңында қарсыласымның командасы менің толық гонорарымды беруді және салмақ лимиті 77 кг-нан аспауымды талап етті. Иә, салмақты жасай алмағаным – менің кінәм. Бірақ Қостанай – менің туған қалам. Жанкүйерлерім осы жекпе-жекті күтіп отыр. Мұндай турнирлер бізде күнде бола бермейді, сондықтан қандай жағдай болмасын, рингке шығуға бел будым», – деді Саралапов.
Айта кетейік, лига ережесіне сәйкес, салмақтан өте алмаған Тамирлан Саралапов чемпиондық белбеу үшін таласу мүмкіндігінен айырылды. Дегенмен, салмақ лимитіне сай келген қарсыласы үшін бұл жекпе-жек әлі де титулдық мәртебеге ие.