Волейболдан Қазақстан чемпионаты: «Ақтөбе» түркістандық «Тұранды» жеңді
Талдықорған қаласында волейболдан әйелдердің ұлттық лига командалары арасында өтіп жатқан Қазақстан чемпионатының төртінші турында «Ақтөбе» мен «Тұран» (Түркістан) шеберлік байқасты, деп хабарлайды Prosports.kz тілшісі ҚазАқпаратқа сілтеме жасап.
Өткен жылы ел чемпионы атанған «Тұран» клубы (бас бапкері Асқар Шалқыбеков) 46 ұпаймен төртінші орыннан үмітті еді. Ол үшін ресейлік маман Юрий Панченко жаттықтыратын «Ақтөбені» жеңуі керек болатын.
Алайда ақтөбеліктер түркістандықтарға тосқауыл қойды — 3:1 (25:22, 25:27, 25:15, 25:18).
Осылайша, төртінші турдың соңғы күні өзара кездесуде «Тұран» 50 ұпайы бар «Қарағандыны» жеңсе де, оған жете алмайды.
Үздік үштіктегі «Қуаныш» (СҚО) «Алматыны» 3:0 (25:15, 25:20, 25:22) тізе бүктіріп, екінші орындағы «Берелден» бір ғана ұпайға қалып тұр.
Павлодардың «Ертісін» 3:1 (25:19, 15:25, 25:18, 25:16) есебімен ұтқан «Грация KZ» (Орал) командасы 9-сатыда қалды.
«Ару-Астанадан» 3:0 (25:15, 25:16, 25:13) есебімен айласын асырған көш басындағы «Жетісу» (Талдықорған) ұпай санын 73-ке жеткізді.
Сейсенбі күні төртінші тур «Алматы» — «Берел», «Ақтөбе» — «Ертіс», «Ару-Астана» — «Қуаныш», «Жетісу» — «Грация KZ» матчтарымен мәреге жетеді.