Волейболдан Қазақстан чемпионаты: «Жайық» алғашқы жеңісіне қол жеткізді
Атырау қаласында волейболдан ерлердің ұлттық лига командалары арасында өтіп жатқан ХХХІІІ Қазақстан чемпионатының бірінші турында «Жайық» клубы алғашқы жеңісіне қол жеткізді, деп хабарлайды Prosports.kz
Қазақстандық маман Виктор Козиктің шәкірттері сенбі күні ел чемпионатының күміс жүлдегері «Павлодармен» шеберлік байқасты.
Оралдықтар матчты қарқынды бастап, бірінші партияда 9:4 есебімен алға шықты. Сол басымдылығынан сет біткенше жаңылған жоқ – 25:13.
Екіншісінде Сергей Грибов жаттықтыратын павлодарлықтар есе қайырды – 25:23. Дегенмен бұдан кейін «Жайық» ойын тізгінін қайтадан қолға ала білді – 25:21, 25:13. Жалпы есеп – 3:1, «Жайықтың» пайдасында.
Әзірге төрт ұпайы бар батысқазақстандықтар турнир кестесінде жетінші, павлодарлықтар (6 ұпай) үшінші сатыда тұр.